Гојазност и пародонтопатија

Пародонтопатијата е второто по зачестеност орално заболување. Најновите истражувања од областа на стоматологијата докажале дека гојазноста е поврзана со пародонтопатијата.

 

Зголемувањето на телесната тежина кај мажите значајно ги зголемува шансите за пародонтопатијата да се влоши. Следењето на “брзината” на добивање на телесна тежина може да даде основа за да се предвиди текот на пародонтопатијата. Кај мажите кои на почетокот имале вишок килограми, и потоа набрзина добиле во телесната маса имаат изразени пародонтопатични промени. Особено значаен показател се смета зголемувањето на обемот на стомакот, што претставува мерка за висцерална гојазност т.е. обложување на внатрешните органи со масно ткиво.


Кога внимателно ќе се разгледаат сите здравствени компликации кои се последица од гојзаноста, наодите од истражувањето на стоматолозите за поврзаноста на гојазноста и пародонтопатијата, нема да бидат изненадување. Општо познато е дека голем број од гојазните луѓе се наклонети кон дијабетесот или повеќето од нив веќе го имаат. Ова заболување ги зафаќа и крвните садови, особено микроциркулацијата – како што се крвните садови на пародонциумот. На гингивата и пародонциумот особено лошо влијание имаат ендокрините проблеми кои се типични за гојазните луѓе.


Од особено значење е начинот на исхрана на гојзаните луѓе, оралната хигиена и здравствените навики. Освен тоа, гојазните луѓе се склони и кон други заболувања како што се астма, остеоартритис, хипертензија, срцеви па и психолошки проблеми. Не само овие заболувања сами по себе можат да имаат негативни последици по потпорниот апарат на забот, туку и лековите кои ги земаат за нивно лекување секако дека дополнително ја влошуваат состојбата на гингивата. Инаку, лошото здравје на устата и забите докажано ја потенцира шансата човекот да стане гојазен. Стоматологот освен советите поврзани за оралното здравје, на ваквите пациенти особено треба да ги советува и за правилна и здрава исхрана.

-авторски текст, не смее да се користи за комерцијални цели и/или ремитување

Д-р Кристина И. Стојаноска - Алоска
Др. Кристина И. Стојаноска Алоска е родена во Охрид, 1984 година. Средно образование завршува во родниот крај, во гимназијата „Св. Климент Охридски“, природно- математичка насока, во 2003година. Дипломира на Стоматолошкиот факултет при Универзитетот „Св. Кирил и Методиј“ во Скопје, во 2008 година. Со работна лиценца за доктор по стоматологија се стекнува по положување на државниот испит во 2009 година. Во соработка со ОО Црвен крст - Охрид издава две брошури поврзани со оралното здравје. По повод Неделата на забоздравствена заштита, во 2014 ја издава Брошурата „ГРИЖА ЗА ЗАБИТЕ“ наменета за најмладите во која се опишани правилата за здрави заби што треба секое дете да ги знае. Следната, 2015 година, за истата цел ја издава брошурата „НАСМЕВКА БЕЗ КАРИЕС“, на малку повисоко ниво, наменета за сите родители и деца, во која се опишани сите нешта поврзани со кариесот и тоа како да се спречи. Во 2017 година издавачката куќа ЕДУКА МАК ја издава нејзината книга со 10 раскази на тема орално здравје, напишани како поезија во проза, со наслов „НАСМЕВКА ЗА ПЕТКА“. Работна пракса како доктор на стоматологија извршува во Стоматолошката ординација "ЕТАДЕНТ" во Охрид, чиј сопственик е од 2019 година. Доктори.мк е портал кој на популацијата и овозможува да согледа многу проблематики од областа на здравството и да научи многу совети и факти за животот , исхраната и здравјето. Мапата претставува одличен и најбрз начин преку кој може да се лоцира доктор или некоја медицинска установа. Особена чест и огромно задоволство ми претставува што сум дел од тимот на Доктори.мк и искрено се надевам дека преку моите статии читателите на Доктори.мк ќе научат многу проблеми од областа на стоматологијата. Доктори.мк според мене е par excellence портал од областа на здравството во Македонија. Големо БРАВО за основачите!!!