Важни совети за заштита од сонцето

Во исчекување на најубавиот и најтоплиот дел од годината, уште еднаш да се потсетиме на Мерките за заштита од штетното влијание на сонцето врз нашето тело и здравје.

Заштита на кожата

При првото изложување на сонце, се препорачува врз кожата да ставите заштитен крем со висок заштитен фактор. Особено треба  да се посвети грижа за новороденчињата и малите деца. Се препорачува заштитна крема да се нанесува секои 2 часа за подобро да делува врз кожата.

Заштита на очите

Очите треба да бидат заштитени од сонцето со очила за сонце кои содржат УВ Б и УВ А филтри. Поради страничната изложеност на очите, се препорачува да се употребуваат  наочари со странична заштита. Ова особено се однесува на детските очила за сонце бидејќи трансмисијата на УВ зрачењето преку очите кај децата е многу поголема отколку кај возрасните. Ретината кај децата е слабо заштитена. Правило е очила за сонце без УВ заштитни филтри да не се употребуваат.

Зошто е важна облеката

Можете да поцрните и преку стакло- прозор, доколку се возите во автомобил.  Иако УВ Б зраците, што предизвикуваат изгореници, не поминуваат преку стакло, УВ А зраците тоа го можат. Нив само им треба повеќе време да предизвикаат изгореници. И овие зраци ја оштетуваат кожата иако ваквото оштетување не е видливо на прв поглед. Човекот може да поцрни дури  и кога е облечен што зависи од дебелината и бојата на облеката. Општо правило е дека лежерна, широка облека  од темна и густа ткаенина штити повеќе од припиена и светла облека од ретка ткаенина.

Сонце и лекови

Доколку земате некои лекови, се препорачува да не се изложувате на сонце. Голем број од лековите  можат да предизвикаат црвенило или осип доколку се изложувате на УВ зраците. Лековите за кои се знае дека предизвикуваат фотосензитивна реакција се следниве:

  •  некои нестероидни лекови
  • антихистаминици
  • фенотиазини
  • хормони(орални контрацептиви)
  • сулфонамиди и некои антибиотици (тетрациклини)
  • орални антидијабетици (при лекување на дијабет тип 2)
  • тиазидни диуретици
  • трициклички антидепресиви

Сонце и козметички препарати

Нанесувањето  на некои дезодоранси, сапуни, парфеми и креми врз кожата пред изложување на сонце можат да предизвикаат фотосензитивна реакција.

Заштита на кожата преку усхрана

Заштитата на кожата започнува од чинијата. Ниту еден козметички препарат нема да ја заштити кожата како правилната и редовна исхрана. Најважно од се е храната да биде богата со каротеноиди кои  ја припремаат кожата за сонцето и Витаминот Ц кој ја штити и обновува. Во исхраната треба да се вклучат и Витаминот Б и магнезиумот. Со секојдневното конзумирање на следниве намирници, ќе ја заштитите кожата од УВ зрачењето, ќе ја поттикнете нејзината регенерација и ќе ја намалите можноста за алергиски реакции од изложувањето на сонце.

Храна која ја штити кожата:

  • какао
  • црн и зелен чај
  • микро алги (спирулина)
  • храна која содржи каротеноиди(праска, кајсија, манго, папаја, морков)
  • храна која содржи ликопен (лубеница, црвена пиперка, црвен портокал)
  • брокула, блитва, спанаќ, коприва
  • храна која содржи токотриенол (масло од палма)
  • храна која содржи Витамин Ц (ацерола, шипка, бобичасто овошје, цитруси)
  • храна која содржи омега 3 (семки од коноп)
  •  храна која содржи хистидин ( ориз, пченица, млечни производи)
  • вода

 

Солариум

Сончањето во солариум носи поголем ризик од сончањето на сонце, кое исто така е ризично и потребно е да се користат заштитни препарати со заштитен фактор. Долгото останување во солариум не само што неможе да помогне во лекување на некои кожни болести, туку може да доведе и до напредување на болеста. Летото е време од годината кога нашата кожа нема квалитет како во текот на останатите годишни времиња.

 Претераната употреба на солариумот може да доведе до проблеми со кожата, пребрзо стареење, карцином на кожата, катаракта и многу други сериозни заболувања. Особено ризични места се пределите на кожата на кои има бемки.

-авторски текст, не смее да се користи за комерцијални цели и/или реемитување-

Др. Кристина И. Стојаноска Алоска е родена во Охрид, 1984 година. Средно образование завршува во родниот крај, во гимназијата „Св. Климент Охридски“, природно- математичка насока, во 2003година. Дипломира на Стоматолошкиот факултет при Универзитетот „Св. Кирил и Методиј“ во Скопје, во 2008 година. Со работна лиценца за доктор по стоматологија се стекнува по положување на државниот испит во 2009 година. Во соработка со ОО Црвен крст - Охрид издава две брошури поврзани со оралното здравје. По повод Неделата на забоздравствена заштита, во 2014 ја издава Брошурата „ГРИЖА ЗА ЗАБИТЕ“ наменета за најмладите во која се опишани правилата за здрави заби што треба секое дете да ги знае. Следната, 2015 година, за истата цел ја издава брошурата „НАСМЕВКА БЕЗ КАРИЕС“, на малку повисоко ниво, наменета за сите родители и деца, во која се опишани сите нешта поврзани со кариесот и тоа како да се спречи. Во 2017 година издавачката куќа ЕДУКА МАК ја издава нејзината книга со 10 раскази на тема орално здравје, напишани како поезија во проза, со наслов „НАСМЕВКА ЗА ПЕТКА“. Работна пракса како доктор на стоматологија извршува во Стоматолошката ординација "ЕТАДЕНТ" во Охрид, чиј сопственик е од 2019 година. Доктори.мк е портал кој на популацијата и овозможува да согледа многу проблематики од областа на здравството и да научи многу совети и факти за животот , исхраната и здравјето. Мапата претставува одличен и најбрз начин преку кој може да се лоцира доктор или некоја медицинска установа. Особена чест и огромно задоволство ми претставува што сум дел од тимот на Доктори.мк и искрено се надевам дека преку моите статии читателите на Доктори.мк ќе научат многу проблеми од областа на стоматологијата. Доктори.мк според мене е par excellence портал од областа на здравството во Македонија. Големо БРАВО за основачите!!!