Најчесто поставувани прашања во врска со оралното здравје на детето од 3 – 5 годишна возраст

Продолжуваме со рубриката “Здрава насмевка за среќно дете”. Овој пат ви даваме одговор на најчесто поставуваните прашања во врска со децата кои се на возраст од 3 до 5 години.

Дали треба да се загрижиме доколку детето цица прсти?

Цицањето прсти (особено палците) е нормално за доенчиња. Поголемиот број деца престануваат со цицање на прстите на 2 годишна возраст. Доколку тоа не го стори Вашето дете, пробајте да го одвикните до 4 годишна возраст. Долготрајното цицање прсти може да доведе до лошо поставување, преклопување и искривување на забите, како и проблеми со џвакањето и загризот.

Дали треба да се санира кариесот на млечните заби?

Доколку дојде до појава на кариес на некое млечно запче, потребно е да се оди на стоматолог и да се отстрани кариесот додека не се направила поголема шуплина на запчето. Секое чекање и одложување на посетата може да направи поголем проблем. Редовните контролни прегледи кај стоматолог ќе Ви бидат од голема корист навремено да се забележи секоја промена на запчињата и во устата воопшто.

Лекување на млечните заби – ДА или НЕ!

Лекувањето на забите понекогаш е рутинска работа, а понекогаш потребно е комплицирано и долготрајно лекување. Се препорачува запчињата да се лекуваат навремено со што би се спречило проширување на воспалителниот процес и не би дошло до појава на гангрена или воспаление на пулпата. Лекувањето започнува со преглед, а потоа дезинфекција со што би се пристапило кон интервенцијата. ВАЖНО е да се лекуваат млечните заби за да можат подолго да останат во устата и да го чуваат местото на трајниот заб заменик. Лекувањето се однесува на поставување лек во забот кој боли, умртвување на нервот и полнење на каналот. Понекогаш сето тоа се прави во една посета кај стоматолог, а понекогаш потребно се неколку пати.

Зошто се важни млечните заби?

Млечните заби се важни од повеќе аспекти. Прво тие се чувари на местото на трајниот заб заменик во забната низа. Доколку се здрави детето ќе може правилно да зборува (правилно да ги изговара буквите) и да јаде без проблем. Исто така ќе може да спие, односно сонот нема да му биде нарушен од забоболка предизвикана од расипаните млечни запчиња.

Дали прехрамбените навики на моето дете се добри? Што треба да јаде повеќе?

Уште од најмала возраст детето треба да ја научи полезноста од здравата храна односно да стекне навика за здрава храна. Тоа подразбира што повеќе да јаде зеленчук, овошје, месо, млеко и млечни производи, јајца и сл.  Родителите треба да му објаснат дека бомбоните и чоколадите неможат да бидат замена за ручекот или вечерата.

 

-авторски текст, не смее да се користи за комерцијални цели и/или реемитување-

Др. Кристина И. Стојаноска Алоска е родена во Охрид, 1984 година. Средно образование завршува во родниот крај, во гимназијата „Св. Климент Охридски“, природно- математичка насока, во 2003година. Дипломира на Стоматолошкиот факултет при Универзитетот „Св. Кирил и Методиј“ во Скопје, во 2008 година. Со работна лиценца за доктор по стоматологија се стекнува по положување на државниот испит во 2009 година. Во соработка со ОО Црвен крст - Охрид издава две брошури поврзани со оралното здравје. По повод Неделата на забоздравствена заштита, во 2014 ја издава Брошурата „ГРИЖА ЗА ЗАБИТЕ“ наменета за најмладите во која се опишани правилата за здрави заби што треба секое дете да ги знае. Следната, 2015 година, за истата цел ја издава брошурата „НАСМЕВКА БЕЗ КАРИЕС“, на малку повисоко ниво, наменета за сите родители и деца, во која се опишани сите нешта поврзани со кариесот и тоа како да се спречи. Во 2017 година издавачката куќа ЕДУКА МАК ја издава нејзината книга со 10 раскази на тема орално здравје, напишани како поезија во проза, со наслов „НАСМЕВКА ЗА ПЕТКА“. Работна пракса како доктор на стоматологија извршува во Стоматолошката ординација "ЕТАДЕНТ" во Охрид, чиј сопственик е од 2019 година. Доктори.мк е портал кој на популацијата и овозможува да согледа многу проблематики од областа на здравството и да научи многу совети и факти за животот , исхраната и здравјето. Мапата претставува одличен и најбрз начин преку кој може да се лоцира доктор или некоја медицинска установа. Особена чест и огромно задоволство ми претставува што сум дел од тимот на Доктори.мк и искрено се надевам дека преку моите статии читателите на Доктори.мк ќе научат многу проблеми од областа на стоматологијата. Доктори.мк според мене е par excellence портал од областа на здравството во Македонија. Големо БРАВО за основачите!!!